Grilled Cheese

ExploreLog inSign up
Terms of UsePrivacy PolicyCommunity StandardsHelpGet the app

Grilled Cheese is a product of Village Compute

Version devBuilt at: 2026-10-19 04:14:37 EDT

PhotosVideosAllPeople
LatestRanked
En expéthînment malîntentionné, la fricach'rêsse en dents d'scie mutinnit, sé dêjutchit, châtchant eune câssetrolée d'paîsson et patates. L'monde au pilôsi s'pâlent dé mutinn'nie et d'tout chen d'ssus d'ssous. Nou dêréchinne les tchênes, dêmonte la troène, et fricache les fielles et frits dé l'avoût. La révolution veint en chabots d'laine, coêffe dé coton, bagues d'or, colyi d'dgiamants, et manté d'mutinn'nie. Nou cope les têtes des agravés; lus huthes halées à dents d'scie boulent êbézouies là-bas sus la bliête. Les êmondas, des liards copés en quat', sont grées auve lé paîsson et les patates. Geraint Jennings
Malinne ou bouonne? Oulle est tréjous chette-là tchi fait d'la d'souothil'lie et bein des rouaux. Si j'lève ma vouaix contre lé granmatica ou la logique ou ses bouôntés, ses maux, ma volanté est înfièrme: rallouongni mes êfforts d'la comprendre v'là tch'est eune boûse. Oulle est d'même qu'oulle est. Et j'en sis-t-i' fyi! Et même si j'l'êcliandre, ch'est autant qu'j'la loûse. J'ai eune tatouêthie d'san nom sus man tchoeu. Ch'est d'la forteune contre l'attaque du Malîn, un sŷmbole dé seûth'té, un porte-bonheu. Même si m's ouothelles 'taient trilyies en êclyîns, j'ouïthais san nom toute la journée. La niet rouaûd'dait quandi qué j'tais à y rêver. Geraint Jennings
La Journée d'la Poésie 2026 Êmèrvilyis d'mots, ravis d'vèrsets - vièrs et d'achteu - j'trouvons l'var tchi nos dêvyie du c'mîn bein battu, d'ches patholes tch'êmèr- -vil'yent à l'assinne quandi qu'lé sonnet r'lit. En roses chèrvettes et vîn êchèrvélé, chu matîn r'vêche et envitoué a l'goût d'èrva-s-y. J'soummes vâqu'tés sus eune mathée d'mèrvelles, craûlant au crai-qu'oui. La mé broue d'bliues Byzantinnes, à êpèrvenche et vèrv- -eine au limon. J'obsèrvons, êbézouis, les louêmes surprînses dé sonnets. V'là not' nèrv- -éthie tch'êcliaque et êtînchèle quandi qu'les poésies lus vèrquent et enteurtil'yent: aniet l'jour veint d'la varvette tch'êmèrvil'ye. Geraint Jennings
La femme honmasse et l'rastafyi chînmentent des renseignements entouor l'êmouleux malîn. Lé p'tit-bé y jopînte. I' vente des nouvelles; les siens d'la ville, pour dé ieux, sont êpithouettés d'ouï la dreine êcliandre. I' s'saient nièrchis même dans eune taupinniéthe où'est qu'la chînment'tie n'laîsse rein à comprendre. Lé brit est salopant; nou pâle pouor niéthe. Lé p'tit-bé et l'pigeon font coucouroux entouor l'êmouleux, la femme et lé p'tchiot. Les renseignements sont dueûrs au run d'doux. Nou porte l'êcliandre en fardé sus san dos. S'nou-s'a des grandes ouothelles, faut un p'tit bé; la femme gronne et l'rastafyi fait mêché.